विरपोस को तिवार

राम राम भाई नs होणी
आज तो आपणो "विरपोस" को दितवार छे । जिनख नी मालम होय तो बतावा की राखी का तिवार का पयल  अवणवाला रविवार ख s इना दिन ख मनावाज भाई राखी को निवतो सासरा वासन बैण का ससर मs लई न न s जायज किलो सवा किलो गऊ न गुड़ पीसो न s पोल्का को कपड़ो बस बैण भाई ख जिमाड़ नs मिठो रादज चूल्हा पs राई तड़तड़ावज भाई ख विदा देज न  s आवण की तैयारी करजs... पण अबर का साळ की कई कवा साल से कोरोना को केहर छे भाई एक बी तिवार नी जक से हुई सक्यो जीव तो पूड़ी को पुड़ीज म छे कव केका प या कोरोना की गाज गिरी जाय न कई नी कई सकता हई।
काई तो जिरोति नs काई नागपंचव....पण यो तो विरपोस छे बिचारा भाई होण न का पाय बन्दी गया कसा जाय गऊ गुड़ को सुपड़ो न पोल्का को कापड़ो लई  नs न।...गाड़ी -घोड़ा भी नि चली रया हई ...याद आवाज आपणी बैलगाड़ी की जोड़ी कसा दादा का साथ बाल पण मs सभि काका बाबा का पोर्या पुरी  खेत म कनडा पs दाल बाफला बणावता था न खळ- खळ वयता नाळ मs बुचुकल्या खाता था..... पण इना कोरोना की महामारी न सबका हाथ पाय  बांधी दीयाज़ कई करा अवखी दुनिया को हाल बेहाल छे।आपण ख सामूहिक रई नs न ज इनि बीमारी से जंग लड्नुज.. कई भारत नs कई अमरीका।
आपणो योगदान यो जs सही की अपण अबरका साल नी मिली पावागा पण कोरोना से तो जीती जवांगा ।......तो तम सब भी इनि वात को धयान धर जो की छेती -छेती रयजो न कई वात नी दूर दूर  की दूरी छे पण मन तो पास पास छे।
सभी भाई बइन नs ख विरपोस की शुभकामना न देवा नs कवा -"जसा या  तवा पर की राई तरतळ वसा जs भाई का दुश्मन नs यो कोरोना तरतळ"....चलो अव तम बठो हम चल्या...का?...चौगान मs अरु का!....लाग डाउन छे भाई  रिकामो नि फिरनो हाई नई तो फिरि तम छे न s तमारा  पीछ पुलिस को जवान भी छे......म खs मत कय जो कि पयलs  क्यो नई बतायो हो......राम राम।