संजा गीत इस प्रकार है_
१) संजा गीत -संजा तू थारा घर जा,
थारी माय मारेगी की कुटेगी,
चाँद गयो गुजरात
की हरणी का बड़ा बड़ा दाँत,
की थारा पोर्या पारी डरपे ला की डर पेला......
संजा तू थारा घर जा,
थारी माय मारेगी की कुटेगी......
२) संजा का सासरs जावा गाs की खाटो रोटो खावागा s
संजा की सासु सोकेली रस्ते चलते मारेगी
अस्सी कस्सी मारे दारी की चार गुलाटी खाएगी ..........
3) संजा बाई का लाड़ा जी लुगड़ो लाया जाड़ाजी
अस्सा कसा लाया दारी का लावता गोट किनारी का
लाया था पर लाया था रास्तो भूली आया था.....
4) आमली का झाड़ निच
बाजा बाजे जी
छोटो सो वीरो
ले घोडी नचावे जी
छोटी सी बेना
ले फूलडा वघावे जी
आमली का झाड़ नींच
बाजा बाजे जी।
5) काजल टिकी लो भई
काजल टिकी लो
काजल टिकी लई ने म्हारी
संजा बाई ने दो
संजा बाई को सासरो सांगा में
पदम्पधारया बड़ी अजमेर
राम थारी चाकरी गुलाम म्हाको देस
छोडो म्हाकी चाकरी
पधारो आपका देस....।
6) गाड़ी नीचे जीरो बोयो
सात सहेल्यां जी,
अणि जीरा की साग बनाई
सात सहेल्यां जी
साग बनाई ने वीरा जी ने मेलि
सात साहेल्या जी
विराजी के म्हणे खाटी खाटी लागे
सात सहेल्यां जी
वाई खीर मैं भैस ने दे दी
सात सहेल्यां जी
भैस ऐ लई म्हने दुधडो दी दो
सात सहेल्यां जी
अणि दूध की खीर बनाई
सात सहेल्यां जी
खीर बनाई ने वीरा जी ने मेली
सात सहेल्यां जी
वीरा जी के म्हणे मीठी मीठी लागे
सात सहेल्यां जी ,
वीरा जी ले म्हने चुनर ओढाई
सात सहेल्यां जी
चुन्नड़ ओडी पाणी चाल्या
सात सहेल्यां जी
पाणी चाल्या काटों भाग्यो
सात सहेल्यां जी
काटो भाग्यो खून निकल्यो
सात सहेल्यां जी
खून निकल्यो चुनर से पूछ्यो
सात सहेल्यां जी
चुनर के तो धब्बा पड़ग्या
सात सहेल्यां जी
वाई चुनर में धोबी ने दी दी
सात सहेल्यां जी
धोबी इ लई म्हने धोई धोई दे दी
सात सहेल्यां जी
वाई चुनर में रंगरेज ने दे दी
सात सहेल्यां जी
रंगरेज लाइ म्हने रंगी रंगी देदी...।
7) कहाँ से लाउ भई हरो हरो गोबर
किसान घरे जऊं
व्हां से लाउं
ले भई संजा हरो हरो गोबर,
संजा तो मांगे
लाल पीला फुलड़ा
कहाँ से लाऊं भई
हरा पीला फुलड़ा
माली घरे जऊ
व्हां से लऊं
ले भई संजा हरा पीला फुलड़ा।
संजा तो मांगे
दूध पतासा
कहाँ से लउं भई
हलवाई घरे जाऊ
व्हां से लाउं
के भई संजा
दूध पतासा...।
8) संजा तू बड़ा बाप की बेटी
तू खाय खाजा रोटी
तू पेरे माणक मोती
रजवाड़ी चाल चाले
मालवा री बोली बोले
संजा सेवरो ले....
माथे बेवडो रे...।
9) छोटी सी गाडी लुढ़कती जाय,लुडकती जाय
जिमें बैठ्या संजा बाई ,संजा बाई
घाघरो घमकाता जाय
चुड़लो चमकता जाय
बाई जी की नथनी झोला खाय झोला खाय...।
10) म्हारा अंगना में मेंदी को झाड़,
दो-दो पत्ती चुनती थी
गाय को खिलाती थी, गाय ने दिया दूध -दूध,
दूध की बनाई खीर-खीर,
खीर खिलाई संजा को, संजा ने दिया भाई -भाई,
भाई की हुई सगाई, सगाई से घर मे आई भौजाई भौजाई...।
11) म्हारो गुल्यो म्हारो गुल्यो सेरी न मs जाय रे भाई सेरी मुड़यो कांटो नावी घर जाय रे भाई ,
नावी नs दिया फुलड़ा देव खs चढाव न जाय रे भाई,
देव न दिया लाड़वा,मगरs बठ्यो कागलो काव कांव करतो जाय रे भाई
पाय मs बन्ध्या मुस्ळा धमधम करता जाय
हाथ म बन्ध्या घुघरा छम छम करता जाय
कान म बांध्या सूपड़ा फटफट करता जाय
आँख म बांधी कवड़ी कटकट करती जाय
नाक म बांधी उन्दरी चाउ चाउ करती जाय रे भाई...।
12) इनी चक्की मs वाचा छै वाचा छे
कोण भाई वीरो वाचा छे वाचा छे
चाँद सूरज भाई वीरो वाचा छे
चाँद सूरज भाई की बैरो खs पैरतs नी आवs
संजा नणद पैरावै छे
संजा नणद को ऊंचो नाक नीचो नाक मोतिया से माँग भरावे छे...।
13)गाड़ी नीचे वटलो वायो देख संजा सोलरिया
वणी वटला के फूल आया देख संजा सोलरिया
वणी फूल के फली आयी देख संजा सोलरिया
वणी फली की मने सब्जी वणई देख संजा सोलरिया
वणी सब्जी ने मने सासुजी के मेली
सासुजी के मने सब्जी खाटी खाटी लगे
वा सब्जी मने भूरी भैंस के आगे फेंकी
देख संजा सोलरिया
वणी भूरी भैंस ने दूध दीदा
देख संजा सोलरिया
वणी दूध की खीर बनाई देख संजा सोलरिया
वा खीर मने संजा ने खिलाई
देख संजा सोलरिया ..।
14)चिड़ी - चिड़ी कोट पर चढ़कर देख
कौन सा विरो आया
सूरज विरा आया
गाड़ी घोड़ा लाया
गाड़ी में भाभी
भाभी के माते पालनो
पालनो में नानो
नाना माते टोपी
टोपी में हीरो
हीरो गयो मंगल में
संजा होदे जंगल में
चिड़ी - चिड़ी कोट पर चढ़कर देख
कौन सा विरो आया
चंद्र विरा आया
गाड़ी घोड़ा लाया
गाड़ी में भाभी
भाभी के माते पालनो
पालनो में नानी
नानी माते टोपी
टोपी में हीरो
हीरो गयो मंगल में
संजा होदे जंगल में ...।
15) *संजा गीत*
मै गोबर सड़क पे खड़ी
मुझे बतलादो संजा गली
अजी वई है गली अजी वई है गली
मैं फूल ले के सड़क पे खड़ी
मुझे बतलादो संजा गली
अजी वई है गली अजी वई है गली
मैं अगरबत्ती ले के सड़क पे खड़ी
मुझे बतलादो संजा गली
अजवई है गली अजी वई है गली
मैं प्रसाद ले के सड़क पे खड़ी
मुझे बतलादो संजा गली
अजवई है गली अजी वई है गली ..
16) अतल बीतल की डोरिया न
बेतल की तलवार जी
कोन्सो वीरो बाग लगावे
कोनसी बेना सींचे जी
चाँद सूरज भई वीरो बाग लगावे
संजा बेना सीचे जी ...।
17)म्हारा आँगन मs गाय ऊबी
वा गाय भल्ली थी भई आंगण पोयटो कर्यो थो
वो पोयटो भल्लो थो भई
गेहूड़ा सुखाया था वो गेहूड़ा भल्ला था भई
घट्टी म धमकाया था वा घट्टी भल्ली थी भई
लाडूला लड़ाया था वो लाडूला भल्ला था भई
पियर पोचाया था वो पियर भल्लो थो भई
चुनर ओढाई थी वा चुनर भल्ली थी भई
बारा मईना चली थी नs फुरफन्दी मs फटी गई...।
